Ni kigero ki umuhungu ashobora gutera inda cyangwa umukobwa agasama ?

Mu gihe cy’ubugimbi n’icy’ubwangavu usanga ari umwana w’umuhungu cyangwa se uw’umukobwa bagira imihindagurikire itandukanye ndetse hakaba n’iyo bahuriraho. Icyo bahuriraho ni nk’ubwoya butangira kumera ahazengurutse ibitina byabo (Insya), gutangira kugira amarangamutima kuwo badahuje ibitsina, ibi bikaba ari nabyo bitegura umwangavu cyangwa ingimbi kuzabyara.Abahanga bakunze kugaragaza ko ku mukobwa impinduka rusange ndetse n’izihariye zikunda kuboneka ageze mu kigero cy’imyaka icumi kugeza kuri cumi n’itanu bitewe n’uburyo bw’imikurire ye. 

Aha atangira kugira amabere, ibibero bikigoronzora, rimwe na rimwe ugasanga imiterere yahindutse. Aha kandi ni naho imirera ntanga ye (ovaires) itangira gukuza intangangore maze agatangira kubona n’imihango. Uretse n’ibi kandi usanga imyanya ndangabitsina ihinduka mu buryo bwo kwitegura kubyara maze kandi ijwi rye rigatangira koroha kuri bamwe.

Ibi bimenyetso biherekezwa no kugira ibishishi mu maso no mu mugongo rimwe na rimwe bityo umukobwa akaba atangiye kumva ko akuze anashobora kwifatira imyanzuro kandi ibyo ashaka bikagenda vuba.

Naho ku muhungu, uretse ibyo ahuriraho n’umukobwa, ubugimbi bwabo butangira kuva ku myaka 11 kugeza kuri 15, uruhu rugatangira rugakomeraho buhoro, agatangira kumera ubwanwa ku munwa wo hejuru, ku matama kuri bamwe ndetse n’ibyoya bikazenguruka umubiri wose,  ibishishi mu maso kuri bamwe, imitsi ikongera umubyimba, ijwi rikiyongera maze  n’amabya agatangira kurera intanga ariho no gusohora bikomora intandaro.

 Nk’uko tubitangarizwa n’urubuga choisirsacontraception.fr, igihe cy’izi mpinduka ni cyo umuhungu cyangwa umukobwa baba bagomba gutangira kwitwararika kabone n’ubwo hari abo bitinda kugaragara ariko akaba yanasama igihe yagejeje ya myaka.

Iki gihe kandi cy’ubugimbi n’ubwangavu gikunda kugira ingaruka ku  rubyiruko rwinshi ari nayo mpamvu usanga Ministeri y’ubuzima ndetse n’ibindi bihugu kwisi hose byita ku buzima bahaguruka batanga amasomo ku buryo butandukanye bwo kwirinda harimo kwifata byaba byanze ugakoresha agakingirizo.

Aha kandi urubuga dukesha iyi nkuru rutangaza ko biba byiza igihe abakiri ingimbi cyangwa abangavu birinze inshuro ebyiri ni ukuvuga gukoresha agakingirizo mu gihe habayeho no gufata ubundi buryo bwo kuboneza urubyaro.

Source:umuganga.com

Uwase Muvunyi Denise